ಒಂದು ಸುಂದರ ಪಯಣ

ಕಿರುಬೆರಳಿಗೆ ಕಿರುಬೆರಳು ತಾಕಿತ್ತು
ಗುಳಿಗಳಲ್ಲಿ ನಗುವು ಮೂಡಿತ್ತು
ನೀ ನಗಲು ಚಂದ್ರ ನಾಚಿತ್ತು
ಇದೇ ಗುಂಗಿನಲ್ಲಿ ನಮ್ಮೀರ್ವರ ಪಯಣ ಸಾಗಿತ್ತು

ನಿನ್ನ ಮಾತಿನಲ್ಲಿ ಗಮನವೇ ಇರಲಿಲ್ಲ
ಅದರ ಧಾಟಿಯ ನನಗೆ ತಿಳುವಳಿಕೆಯಿರಲಿಲ್ಲ
ನಿನ್ನ ಕಂಗಳಲ್ಲಿ ಮುಳುಗಿದ್ದೆ
ಇಂದು ನಿನ್ನ ನಾ ಮನಸಾರೆ ಪ್ರೀತಿಸಿದ್ದೆ

ತಾವರೆಯ ಮೇಲಿನ ಹನಿಯಂತೆ
ನಿನ್ನ ತುಟಿಯ ಮೇಲೆ ಮುತ್ತಿತ್ತು
ಚಂದ್ರನ ಪ್ರೀತಿಗೆ ಹನಿಗಳು ನಾಚುವಂತೆ
ನನ್ನೆದುರು ನಿನ್ನ ಕಂಗಳು ಬಾಗಿತ್ತು

ನಿನ್ನ ಉಸಿರು ಏರಿ ಇಳಿದು
ನನ್ನ ಎದೆಯ ಕೋಣೆಗಳನ್ನು ಬಡಿದು
ನನಗೆ ಪ್ರೀತಿಯ ಬೆಳಕನ್ನು ಹರಡಿ
ಸ್ವತಂತ್ರನನ್ನಾಗಿಸಿತು ಸರಪಳಿಗಳನ್ನು ಕಡೆದು