ಬಣ್ಣದ ಕಾರಂಜಿ

ಬಣ್ಣಗಳ ಕಾರಂಜಿ
ಪುಟಿದೆದ್ದಿತ್ತು ಬಾನಿನಲಿ
ಮೇಲೇರಿ ಕೆಳಗೆ ಜಿನುಗಿ
ರಂಗೇರಿಸಿತ್ತು ಕಣ್ಣಿನಲಿ

ಮೂರ್ನಾಲ್ಕು ನಾಲ್ಕೈದು
ಸಾಲಾಗಿ ಹರಿದಿತ್ತು ಕಾರಂಜಿ
ಬಣ್ಣಕ್ಕೆ ಸರಿಯಾಗಿ ಹಾಡಿತ್ತು ಆಡಿತ್ತು
ಬೆರೆತಂತೆ ಜೇನು ಹಾಲಿನಲಿ

ಬೇಕಾದಂತೆ ಬಳುಕಿ ತುಳುಕಿ
ನವಿಲನು ನಾಚಿಸುವ ಕಾರಂಜಿ
ಮಳೆಯಲ್ಲಿ ಮಾತ್ರ ಕುಣಿಯುವುದು
ನವಿಲು ಯಾವುದೋ ಕಾಡಿನಲಿ

ನೀರೇನು ಹಾಡೇನು ಎಂಥದ್ದು ಬೇಕಿಲ್ಲ
ನಾ ಕಂಡೆ ಇಂಥದ್ದೆ ಕಾರಂಜಿ
ಕಾಡೇನು ನವಿಲೇನು
ತಿಳಿಯಲ್ಲ ಬಿದ್ದಾಗ ಪ್ರೀತಿಯಲಿ